Beschreibung:
“Die volheid van die lewe en die wye omvang van lewensvrae vind hier neerslag. Ds. Izak se prediking was, soos sy persoonlikheid, eiesoortig. Filosofiese en literêre verwysings word met anekdotes uit sy eie lewe en vertellings uit die geskiedenis van die mensdom afgewissel … Sy unieke spreek- en preekwyse kan nog talle mense help om tot ’n dieper verstaan te kom van die veelkleurige genade van die God in wie se diens hy gestaan het.”Dr André Barlett
Die alomgeliefde spreker en skrywer ds. Izak de Villiers se laaste preke is in hierdie inspirerende bundel saamgevat. Dié preke, wat nog nooit gepubliseer is nie, is uitgesoek en verwerk deur Amanda Botha, ds. Izak se letterkundige eksekuteur en self ’n bekende in boekkringe. Die preke is meestal tussen 2007 en 2009 by die NGK Aasvoëlkop gelewer.Ds. Izak se preke is, soos lesers hom leer ken het, prakties en gerig op moderne mense se daaglikse lewe. Sy fokus is telkens op die wonderlike hoop van die evangelie, wat ons bemoedig en inspireer. Hy onderstreep die kleinheid van die mens en die grootheid van God, maar wys hoe God hom oor ons ontferm sodat ons kan weet dat ons nooit alleen is nie.